Roldan: Mr. and Mrs. Santos Bravo Sr.

DAGHAN ang naila tungod sa ilang talagsaong talento ug kahanas sa pag-awit, pagsayaw, pagdebuho ug uban pa. May naila sa ilang paghupot og hataas nga gahum ug awtoridad sa gobyerno. Anaa say naila tungod sa ilang pagkakurakot ug pagbuhat sa dautan. Apan dinha sa Padada may usa ka pamilya ng naila tungod sa ilang talagsaong natampo sa pag-umol sa edukasyon sa kabataan ug hamtong niining dapita. Sila ang pamilya ni Mr. Santos ug Mrs. Maria Lourdes C. Bravo nga nipanaw sa kalibutan di pa lang kaayo dugay. Namatay si Mr. Bravo niadtong Nobyembre o Disyembre 2010 ug ang iyang kapikas sa niaging Pebrero.

Nahimo silang lig-ong haligi sa edukasyon diha sa Davao del Sur isip mga magtutudlo sa kanhi St. Michael's College nga karon St. Michael School of Padada, ug sa Southeastern College. Si Mr. Bravo isip reserved officer sa Army maoy Commandant ug prefect of discipline sa eskwelahan ug madaling matawag sa problema sa mga bata. Nagsilbi usab siyang konsehal sa lungsod sa Padada sa daghang katuigan. Samtang si Mrs. Bravo maoy nagtudlo sa lisod nga subject nga Math, Algebra, Geometry ug susamang linya. Nahimo silang ehemplo sa mga kabataan ug sa mga buot motukod og pamilya tungod kay puro nagmalampuson ang lima nila ka mga anak.

Ang kinamagulangan mao si Achilles "Ike" C. Bravo nga karon regional director sa Department of Budget and Management (DBM) Region XI. Ang sunod mao si Dr. Sonny Bravo, Jr. nga kanhi municipal health officer sa Kiblawan ug karon nanimuyo sa New Jersey sa Amerika. Ang ikatulo nga akong ka-batch sa high school mao si anhing Marilou nga chemical engineer ug nagtungha sa medisina sa Legaspi City una siya namatay. Ang ikaupat mao ang pinakaabtik ug PMA graduate nga si Lt. Col. Alexis Noel Bravo nga may krusadang ALTO (Anti-Lotto) ug anti-corruption campaign sa probinsiya sa Davao del Sur. Ang nisunod sa tunob sa ilang ginikanan sa pagtudlo mao si Aloissius Bravo nga nahimong opisyal sa Tesda.

Di matugkad ang respeto ug pagdayeg sa tanang katawhan niining pamilya nga bisan pa sa ilang nakab-ot nga estado sa pamuyo nagpabilin kining yano ug mapainubsanon. Kung wa ko masayop, hangtud karon wa pa tawon nahuman ang likod nga bahin sa ilang balay nga sagad namong suroyan ug dulaan.

Wa sab akoy masulting salawayon sa ilang mga anak nga mora usab namong igsoon kay nagtubo sila mga ligdong ug sulundon sa ilang tagsatagsa ka pamilya karon. Subo lang nga wa ako makahigayon sa pagduaw sa yaha ug lubong sa ilang duha bisan pa man kon ako ang usa sa pinakaunang nakahibalo sa nahitabo ni Mrs. Bravo samtang gitangtang na ang iyang life support system sa ICU sa SPMC. Hinuon napahibalo ko ang akong mga ka-batch, pamilya ug mga higala nga suod usab sa mga Bravo. Hinuon kahibalo ako nga masabtan nila ang mga kakulian sa uban nga wala makatambong sa lubong sa ilang ginikanan ug mapasalamaton sa mga pag-ampo ug halad sa Santos nga Misa alang sa ilang malinawong pagpanaw ngadto sa kinabuhing walay katapusan.